Паррандалар сонини 2 хил усулда кўпайтириш мумкин: сунъий усулда инкубаторлар ёрдамида ва табиий усулда товуқларга тухум бостириш орқали. Товуқлар учун зарур шароитлар яратиб берилгандагина, табиий усулда жўжа олиш ўз самарасини беради.
Товуқларга тухум бостириш ишлари баҳор ойларида амалга оширилади. Чунки айнан ушбу мавсумда товуқларда кўрк бўлиш инстинктлари кучаяди. Шунингдек тухумлардан чиққан жўжалар иссиқ ва мўтадил ҳароратда улғайишади. Тухум бостириш учун товуқларни танлашда уларнинг зоти катта аҳамият касб этмайди. Фақатгина касал, нимжон ва бройлер товуқлар тухум бостиришга ярамайди. Тухум бостириш учун танланадиган товуқнинг ёши 7 ойликдан катта бўлиши керак.
Бостириш учун фақат янги, тўғри шаклга эга, пўчоғи зарарланмаган тухумлар танланади. Товуқ остига жойлаштириладиган тухумлар сони парранданинг танаси ўлчамлари, зотига қараб фарқланади. Айрим гавдали товуқлар 15 тагача тухум босиб, жўжа очириши мумкин. Товуқлар ўз тухумларидан ташқари ғоз, ўрдак ҳамда курка тухумларини ҳам яхши босиб ўтириши мумкин. Тухум бостириш жараёни кечки пайт амалга оширилади. Оталанган тухумлар терилиб, устига товуқ эҳтиёркорлик билан жойлаштирилади. Кўрк товуқлар асосий галадан четроқда тинч уяда сақланади. Кўрк товуқ уяси ўлчамлари 45х35 см бўлиши тавсия этилади.
Жўжаларни тухумдан очиб чиқиш муддати ўртача 21 кунни ташкил этади. Кўрк товуқлар тухумлари бостириш давомида 3 марта (7, 11 ва 18 кунликда) овоскоп ёрдамида кўздан кечирилади. Брак бўлган тухумлар аниқланса чиқариб ташланади, қолган тухумлар эса марказроққа суриб қўйилади.
Тухумлардан биринчи ёриб чиққан жўжаларни кўриб, товуқлар қолган тухумларни босмай чиқиб кетишига йўл қўймаслик керак. Чунки тухумдан янги чиққан жўжалар қуригунича она товуқ бағрида бир неча соат бўлишлари зарур. Жўжалар патлари қуригач уларни эҳтиёткорлик билан сават ёки коробкага териб олиш мумкин.
Манба: kakvybratvsjo.ru
[print-me]
