САВОЛ:
Тасодифан чорва молларим фермернинг экинзорига тушиб кетди. Шунда улар қўйларимни бир бошидан бўғизлай бошлади… Аслида қонунчиликда чорва моллари экинзорларни пайҳон қилса, қандай чора кўрилади? Шу ҳақда маълумот берсангиз.
ЖАВОБ:
Қонунчиликда чорва моллар ёки паррандалар экинзорларни пайҳон қилиш ҳолати юз берса, экинзорлар пайҳон қилинган жойда ушланган чорва моллари маҳалла фуқаролар йиғинларига топширилади. Экинзор эгалари фақат чорва моллари эгасига нисбатан Маъмурий жавобгарлик тўғрисидаги кодекснинг 104-моддасига кўра: чорва моллар ёки паррандаларнинг хўжалик экинзорларини пайҳон қилиши, қишлоқ хўжалик экинларининг далада тўплаб қўйилган ҳосилига зарар етказиши ёки уни йўқ қилиб юбориши, кўчатларга шикаст етказиши фуқароларга энг кам иш ҳақининг бир бараваридан 3 бараваригача, мансабдор шахсларга эса 3 бараваридан 5 бараваригача миқдорда жарима солишга сабаб бўлади. Етказилган зарар тўлиқ ундириб олингач чорва моллари эгасига қайтарилади.
Бундан ташқари, экинзорларни ёки кўчатзорларни ҳамма турдаги ҳаракатланувчи техника воситаларида босиб ўтиш ҳам энг кам иш ҳақининг 3 бараваридан 5 бараваригача миқдорда жарима солишга сабаб бўлади.
Юқорида назарда тутилган ҳуқуқбузарликлар маъмурий жазо чораси қўлланилганидан кейин бир йил давомида такрор содир этилган бўлса, фуқароларга энг кам иш ҳақининг 5 бараваридан 7 бараваригача, мансабдор шахсларга эса 5 бараваридан 10 бараваригача миқдорда жарима солинади. Юқоридагиларни ҳисобга олиб, хулоса қилиш мумкинки, чорва моллар экинзорларни пайҳон қилса, уларни бўғизлаш мумкин эмас.
Саволга Сурхондарё вилоят адлия бошқармаси мутахассиси Сайқалбек АЛЛАЁРОВ жавоб берди.
Манба: surxontongi.uz
[print-me]
