Жиззах вилоят ҳудудида ҳозирги кунга қадар 12 та экспортёр корхоналар ковул экспорти билан шуғулланиб келмоқда. Жорий йилнинг январ-август ойлари давомида жами 3 миллион 244 минг АҚШ доллари қийматидаги 1909 тонна ковул “Жиззах” ТИФ божхона постида экспортга расмийлаштирилган.
Ковул асосан Ғаллаорол, Зомин ва Шароф Рашидов туманларидаги ташқи иқтисодий фаолият иштирокчилари томонидан Туркия ва Испанияга экспорт қилинган.
Ковул ўзи нима?
Ер бағирлаб ўсадиган ушбу тиканли бута жой танламайди, сувсизликка ва совуққа чидамли. Майдан то октябрь ойигача ўсади. Дона-дона бўлиб гуллайди. Сўнгра бир уяли гўштли реза мева беради. Икки паллали ушбу мева худди тарвузга ўхшайди. Фақат митти тарвузлар…

Юртимизнинг тоғ ёнбағирли ҳудудларида табиий ҳолда ўсади. Жумладан, Жиззах вилоятининг Зомин, ўаллаорол, Фориш, Шароф Рашидов, Андижон вилоятининг Булоқбоши, Наманган вилоятининг Чуст ва Косонсой туманлари, Тошкент вилоятининг тоғолди ҳудудларида кўплаб учратиш мумкин.
Ковулнинг ғунчали новдалари, ғунчалари, ривожланаётган мевалари сирка кислотасида мариноват қилинади ҳамда озиқ-овқатда «каперслар» номи билан машҳур дори-дармон кўринишида фойдаланилади.
Пўстлоғидан тайёрланган дамлама иштаҳа очувчи таъсирга эга. Халқ табобатида йирингли яраларни даволаш учун ишлатилади. Янги шилинган пўстлоғи оғриган тишга босилганда ижобий натижа беради. Баъзан очиқ йирингли яраларга қўйилганда антисептик таъсир қилади. Бундан ташқари ўсимликдан стенокардияда, тиреотоксикоз, геморройда, қандли диабет касаллигини даволашда ҳам фойдаланилади.
Манба: sof.uz
[print-me]
