Ўзбекистон Республикаси Гидрометеорология хизмати марказининг хабар беришича, жорий йилнинг 1-2 май кунлари Республикамиз ҳудудига Туркманистон орқали Каспий денгизининг жанубий районлари устида шаклланган нам ҳаво оқими киради.
Бухоро, Навоий, Қашқадарё, Сурхондарё, Самарқанд вилоятларида 1 май санасида куннинг иккинчи ярмида ёмғир, айрим жойларга кучли ёмғир ёғиши кутилмоқда, момақалдироқ бўлиши мумкин. Шу куни кечга бориб Республиканинг қолган ҳудудларида ҳам ёмғир, айрим жойларга кучли ёмғир ёға бошлайди. Аммо Қорақалпоғистон Республикаси, Андижон, Наманган, Фарғона вилоятларида ёғингарчилик бўлмайди.
Республикамизнинг айрим ҳудудларида ёмғир ёғиши ва момақалдироқ 2 май куни ҳам давом этади. Бухоро ва Навоий вилоятларида кечаси ва эрталаб ёмғир ёғиб, айрим жойларга кучайиши мумкин. Шу куни Қорақалпоғистон Республикаси ва Хоразм вилоятида ёғингарчилик кузатилмайди.
Мазкур кунларда шамолнинг тезлиги 15-20 м/с гача кучайиши, айрим жойларда 23-28 м/с гача етиши мумкин.
Шунингдек, 30 апрель – 3 май кунлари республиканинг тоғолди ва тоғли ҳудудларида сел келиши хавфи бор.
Манба: «Гидрометеорология хизмати маркази» телеграмм канали
[print-me]
