Калифорния қуёни — маҳсулдорлигига кўра гўшт етиштиришга ихтисослашган қуён деб эътироф этилган. Танасининг нисбатан кичик бўлишига қарамай ушбу қуённинг тирик вазни 4,2-4,5 кг га бориб етади. Айримлариники бундан ҳам оғир бўлади. Суяклари нисбатан ингичка ва қисқа бўлса ҳам танасидаги барча мушаклари яхши ривожланган. Бўйни жуда қисқа деярли сезилмайди. Шу сабабли боши бироз кўтарилган.
Рус сувсаридан серпуштлик ва юқори сифатли мўйнани мерос олган (мўйнасининг момиқлиги сезилмас даражада дағал, қалин ва зич бўлади). Питирёғи зич ва қалин. Юнги оқ, ялтироқ. Оёқларининг пастки қисми, қулоқлари, тумшуғининг учи ва думи тўқ жигар ранг, деярли қора, айримлари бўйнининг пастки қисмида кичик қора доғлар кўринади. Қулоқлари жуда қисқа бўлиб, доимо тик туради. Кўзлари қизғиш-пушти, тиниқ, нигоҳи жонли, табиатан серғайрат, бироқ феъл-атвори вазмин. Танасининг гўштли жойлари ортиқ даражада катталашиб кетганлигига қарамай эркак қуён жуда фаол бўлади. Урғочи қуён муттасил 8-9 бошдан бола беради.
Калифорния зотларига мансуб қуёнларнинг асосий афзалликлари қуйидагилар:
- тез етилиши;
- серпуштлилиги;
- организмининг чидамлилиги;
- қисқа вақт ичида сўйса бўладиган даражада етилиши;
- бошқа зотларга нисбатан сергўшт бўлишини киритиш мумкин.
Икки ойли жониворнинг тирик вазни 1,8 кг га, яхши боқилгани 2-2,3 кг га, 3 ойга тўлганида 2,6-2,7 кг га етади. Танасининг фойдали қисми (гўшт-ёғи) тирик вазнинг 60% ни ташкил этади.
Манба: «Томорқа хўжалигида қуёнчилик», Долимов Ш.З.
[print-me]
