Ток кўчатлари асосан кузда ва баҳорда ўтқазилади. Узум кўчатларини экиш учун дастлаб, ерга яхшилаб ишлов берилади, ўғитланади. Узум боғларида кўчатлар орасини 1-2 ёки 3 метр қилиб, қаторлар орасини эса 2-2,5 ва 3 метр қилиб экилади. Томорқаларда сўритокларда етиштирилганда эса шароитга қараб, туплар орасини 50-60 см дан қилиб экиш мумкин. Лекин бу ҳолда экилганда ҳар бир туп учун фақат 2-3 ёки 4 тагина асосий новда қолдирилади.
Кўчат учун қазилган чуқурнинг кенглиги ва чуқурлиги 60-70 см атрофида бўлади. Узум кўчатларини экишдан олдин зарарланган ва қаламчанинг юқорисидан чиқган илдизлари ток қайчида кесиб ташланади. Фақат пастда жойлашган бақувват илдизлар қолдирилади. Бу илдизларнинг ҳам 12-15 см қисмини қолдириб кесиб ташланади. Кўчатнинг ҳам 2-3 та бақувват новдаларини қолдириб, қолганлари кесиб ташланади. Шундай қилинса ўтқазилган кўчат тез ва яҳшироқ ривожланади.
Агар биринчи марта токзор ташкил қилаётган бўлсангиз, қаторлар тўғри чиқиши учун ип тортиб олишингиз мумкин.
Кўчатни ўтқазишдан олдин унинг илдизини гўнг ва тупроқдан тайёрланган суюқ лойга ботириб олинади. Агар кўчатларни кузда ўрнатилган бўлса совуқдан ҳимоялаш учун уларнинг устини 30-35 см қалинликда тупроқ билан ёпилади. Кўмилган кўчатларни баҳорда осон топиб олиш учун қозиқ қоқиб қўйиш мумкин.
Кўчат оралари қалинроқ экилган тақдирда кейинчалик кўчат ҳосил беришни бошлагандан кейин новдаларни камроқ қолдириш керак бўлади. Кўчатлар яхши кўкариб кетгунга қадар тез-тез суғориб турилади.
Манба: mirishkor.uz
[print-me]