Чиннигул илдиз орқали ердан ундириб ёки уруғ сепиш орқали кўпайтирилади. Чиннигул кўп йиллик гул тури бўлгани учун илдизлари орқали ёнидан куртак чиқариб кўпайиш хусусиятига эга.
Уруғ сепиб кўпайтиришда соғлом, яъни пишган уруғ танлаб олинади. Қуритилган уруғ сувга бўктирилган ерга сепилади ва уруғ усти тупроқ билан юпқа қилиб ёпиб чиқилади. Сепилган уруғ 10-15 кунда униб чиқади. Униб чиққандан кейин 50-60 кунда экишга тайёр бўлади.
Чиннигул тупроқ танламайди, лекин таркибида бир оз оҳак бўлган, соғ, унумдор ва донадор тупроқли ерни кўпроқ ёқтиради. Тупроқ ҳар квадрат метрига 4-5 кг гўнг ва 400-500 г қум қўшиб чопилади. Агар тупроқ қумли, юмшоқ бўлса, ҳап квадрат метрга 3-4 кг гўнг солиб чопилади.
Очиқ майдонларда 50-60 см ли қаторлар тайёрланади. Йирик гулли чиннигул етиштириш учун иккидан бир қисм соз тупроқ ва яна иккидан бир қисми чириган баргдан иборат аралашма тайёрланиб, бунга тупроқнинг қай даражада зичланганига қараб, қум қўшилади.
Чиннигулни турлари ва навларига қараб май-июнь ойидан то август ойларигача чала офтобли жойга ўтқазиш мумкин.
Очиқ майдонларда 25-30 см ли қаторчалар тайёрланади. Сўнгра 10-15 см ли чуқурчалар тайёрланади. Намликни сақлаш мақсадида туп айланасига 2-3 см қалинликда ёгоч қириндиси сепилади. Доимий жойга гул кўчатини экишда 50х30 ёки 60х25 см ли схемалар танланади. Чиннигулга суюқ ўғит яхши таъсир қилади. Суюқ ўғитни тайёрлаш учун 10 л сувга 20 г мол гўнги қўшилади.
Яхши ачигандан кейин ўсимлик дастлаб ҳар олти кунда бир марта, бир оз вақт ўтгач – икки марта ана шу суюқ гўнг билан суғорилади. Суюқ ўғит фақат ғунчалар ҳосил бўла бошлаганда солинади. Бундай ўғит солингандан кейин ўсимликлар бир ёки бир неча марта тоза сув билан суғорилади. Тўғри агротехник чора тадбирлари олиб борилганда ўсимлик тўпидан 6-8 та гул олиш мумкин.
Чиннигул ёз кунларида ҳар 10-15 кунда 2-3 маротаба захлатмасдан суғорилади.
Чиннигул асосан май, июнь ойларида чириган гўнг билан озиқлантирилади.
Тупроқни юмшатиш дастлабки йиллари 6-8 маротабагача ўтказилади. Қатор оралари қўл кучи ёрдамида 10-12 см чуқурликда кетмон билан чопиқ қилинади. Бу ишлар суғорилгандан 2-4 кундан сўнг амалга оширилади. Гулзор доимо бегона ўтлардан тозаланади.
Чиннигул асосан оқ пашша ва занг касалликларига мойил. Бу касалликларга қарши асосан олтингугурт ва бошқа кимёвий дорилар сепилади.
Манба: «Боғбоннома», Ҳусайн Каримов, Ҳамро Ортиқов